多蒙特主W有揸拿

猪拉多纳

出線勢危冇退路

死亡F組矚目戲碼，上屆亞軍多蒙特坐鎮主場火併拿玻里。多蒙特近期連番失利，傷兵又一籮籮，但依家出線形勢危殆，今仗一定豁出去爭勝，相反拿玻里和波都冇壞，隨時踢到綁手綁腳影響發揮，所謂哀兵必勝，斯維決定撐戰意十足嘅「蜜蜂兵團」。

(有線61及201周三凌晨3時45分直播)
焗攻搶奪黃金3分

從近3仗輸晒嚟睇，多蒙特狀態確實欠佳，雖有右閘比薛斯基及時復出，但只屬杯水車薪，因為蘇保迪、曉姆斯及舒姆沙等守將全部傷晒，剛來投嘅文奴費特列治未有報名不得於歐聯披甲，成條防線天殘地缺。正所謂有危亦有機，聯賽已經畀拜仁拋離7分，歐聯就成為多蒙特重要目標，睇番F組排第3位嘅多蒙特現落後阿仙奴、拿玻里3分，今仗有乜依郁輸埋畀拿玻里的話，就會提早出局，為咗轉危為安，「蜜蜂仔」冇得諗咁多，一定化悲憤為力量，搏甩髀力爭3分，決心十足。
拿玻里求穩未必掂

反而拿玻里今仗和波都OK，目標冇多蒙特咁鮮明，主帥賓尼迪斯最鍾意諗埋晒啲縮數，以唔輸為目標，但求穩之下或會踢到畏首畏尾，隨時令球員進退失據。事實上拿玻里亦經歷兩連敗，上仗意甲對帕爾馬落後嗰陣，賓帥焗住換入原本留力對多蒙特嘅中場核心咸錫，點知呢位副隊長出場冇耐就拉傷，今仗肯定唔出得，真係偷雞唔到蝕把米。

生死關頭戰意行先，況且多蒙特前線嘅羅拔利雲度夫斯基、馬高列奧斯、奧巴美揚反擊快到無倫，實恰死轉身極慢嘅拿玻里中堅艾比奧爾，主守好難捱到尾，1.54倍主勝熱得有道理。