多蒙特打「大」交 拿玻里爭出線

猪拉多纳

迷彩戰隊突襲傷殘蜜蜂

歐聯分組賽殺入最後直路！剩番兩個比賽日，「死亡F組」今晚多蒙特主場對拿玻里一戰實在好關鍵，上屆亞軍多蒙特依家落後拿玻里同阿仙奴3分，要出線唔可以再有閃失，今晚主場出擊肯定會喪攻拿玻里。不過「蜜蜂兵團」後防傷晒面目全非，好難頂住「迷彩戰隊」嘅希古恩同荷西卡利祖唔失波，捧1.52倍入球大！

（有線61及201、中央5台周三凌晨3:45直播）
蜜蜂新簽守將歐聯唔出得

以現時形勢，多蒙特今場如果贏唔到，去到下一輪先話搏出線其實係聽天由命，與其被動等個天幫，不如自己今場爭氣贏波攞番個主動權好過啦！事實上佢哋火力一向有保證，羅拔利雲度夫斯基、米希達利恩、奧巴美揚同馬高列奧斯呢個攻擊組合有技術有速度，冇人會懷疑佢哋嘅入球能力。

睇番上周六輸畀拜仁慕尼黑場波，「蜜蜂兵團」最大問題係後防線，蘇保迪因為十字韌帶斷裂提早收咧，拍檔曉姆斯又話要抖到出年1月先出得，佢哋於是急急腳簽入老將中堅文奴費特列治救急，不過因為未註冊歐聯今晚唔出得，對人腳緊絀嘅防線都係幫唔到手。
拿玻里希古恩搭卡利祖煞食

拿玻里今季整咗件迷彩作客波衫，好多粉絲都大讚，「迷彩戰隊」依家喺F組排第2出線有優勢，但最後一場分組賽要硬撼阿仙奴，所以今場都唔可以掉以輕心。佢哋依家最煞食嘅係希古恩拍荷西卡利祖嘅鋒線，加埋個反擊好手恩斯治，今晚作客若果一心踢反擊戰，隨時搞到多蒙特後防立立亂。既然兩隊都有本事入波，開入球騷又有幾難！
Data King 多蒙特連續6場失波

‧小組首循環拿玻里主場贏多蒙特2:1。

‧多蒙特連續6仗有失波。

‧拿玻里今屆4場歐聯分組賽有3場開大。
乜都玩錦囊 蜜蜂兵中門大開讓唔起

連環輸畀阿仙奴、禾夫斯堡同拜仁，多蒙特自2010年2月以來首次錄得3連敗，最弊係「蜜蜂兵團」後防穿晒大窿，今晚焗攻隨時畀拿玻里有機可乘，仲學人讓波邊信得過？拿玻里受讓半一梗係捧2.05倍下盤啦！
頂占筍盤：多蒙特（入球大）