歐霸好波連場啱晒夜貓！

猪拉多纳

剛逢大敗滿肚火 熱刺-1啱素

兩支英格蘭球隊分途出征歐霸盃，其中熱刺作客挪威嘅特林素，熱刺上場聯賽恥辱性大敗，需要一場勝仗重返正軌，否則保亞斯（AVB）帥位不保，捧熱刺讓球客勝。至於英冠嘅韋根則喺主場對比利時球隊華雷根，呢場屬出線關鍵一戰，預料雙方踢得謹慎，細盤可取。

熱刺雖然喺K組穩奪出線資格，但球隊喺聯賽錄得兩連敗，今場唔可以再輸，尤其AVB近排備受壓力，除咗之前作客愛華頓懶醒畀受到腦震盪嘅洛里斯繼續上陣，引來各方指摘，上仗更衰到畀曼城炒六蛋，成班「刺迷」睇到眼火爆，認為係AVB排錯陣搞到輸得咁甘，要求主席利維請佢食豉椒炒魷，AVB依家就好似踩緊條鋼線咁，稍一不慎就會跌落萬丈深淵，故今仗AVB定要大勝一場先可以振奮球隊士氣。

（有線64及203台周五凌晨2時直播）
韋根「細」頂華雷根

至於韋根對比利時球隊華雷根，現時兩隊分別喺D組排緊第二同第三，僅相差一分，雖然今仗邊隊贏波都會大大提升出線機會，但同樣代表邊隊輸咗就好大機會出唔到線，所以兩隊睇怕都唔想輸，況且主隊韋根今季踢法偏向保守，失波少同時入波亦少，今仗捧細為妙。

（有線63台周五凌晨4時05分直播）　

猪拉多纳