水手細嗒天鵝肉

猪拉多纳

贏埋今仗提早封王

日職專家蘇豪去咗新加坡叉電，波童知道今日要代筆，當然趁佢臨行前請教吓佢有乜心水，蘇豪認為橫濱水手會係今季日職冠軍真命天子，事關大軍今季演出勝在夠穩陣，除咗後防唔易失波，前鋒又往往可以把握僅有機會將對手置諸死地，踢法夠效率。水手今日只要喺主場擊敗新潟天鵝便能第四次贏得J-League冠軍，預計都係穩中求勝格，捧細盤最好路。

日職仲有兩輪比賽，水手上周作客擊敗磐田山葉係爭標最大關鍵，事關其餘兩支競爭對手浦和紅鑽及廣島三箭上輪齊齊輸波，令橫濱水手榜首優勢拉開至四分，換句話講佢哋只要今場贏波便可提前捧盃，決心唔需要懷疑。不過正如剛才所講，水手今季贏在經驗夠，自知陣中多老將，唔會刻意同對手鬥快，反而着重控球在腳搵機會，上場贏山葉就係最典型例子，今次面對聯賽三連勝嘅新潟天鵝相信都係同樣情況，首選細盤。
櫻花鹿角搶分大搏錘

另一場直播由大阪櫻花主場鬥鹿島鹿角，兩軍目前同得五十六分排四、五位，落後榜首水手六分，爭標機會名存實亡，不過呢場勝負關係到來季亞冠盃參賽資格，櫻花上周扑低咗爭標隊伍廣島三箭，當然希望乘勝追擊。鹿角作客失球數字係全日職第二多，今場捧大盤。
橫濱水手Vs新潟天鵝

有線61及201台直播
大阪櫻花Vs鹿島鹿角

有線64及203台直播