死神回歸 卡城「大」劑兵工廠Goal手輪流發威

猪拉多纳

兵工廠Goal手輪流發威

阿仙奴表現超出預期，呢支英超「一哥」今晚造訪卡迪夫城，「死神」艾朗藍斯仲會披甲倒戈母會添，計人腳同戰意都真係秤贏對手幾條街，但考慮到「兵工廠」周中先喺歐聯搏完命，個客W又熱到得嗰1.5倍，既然卡城主場狂轟猛炸都搵到啖食，倒不如轉撐1.75倍入球大，又好分又過癮。

（now621台周六晚11:00直播）

今場波嘅主角唔使問都知係阿仙奴中場艾朗藍斯，皆因卡迪夫城正正係呢位威爾斯「死神」嘅母會，今季弗到爆嘅艾朗藍斯賽前就話，即使倒戈相向都肯定唔留手，幫「兵工廠」鞏固榜首領先優勢最重要喎，戰意同鬥心都爆晒燈！
阿仙奴防線唔穩陣

除咗藍斯，阿仙奴仲有大把攻擊好手，奧斯爾、基奧特同韋舒亞有幾勁唔使多講，反而比利仔最欣賞嘅係佢哋輪流爆發，一人威一場，一個跌Watt咩？仲有另一件頂上，鋒力根本唔使擔心。只可惜，阿仙奴嘅問題始終係條防線，門將施捷斯尼出晒名神經刀，中堅哥斯尼仲大鑊，成日輸12碼畀對手，個客W熱到得1.5倍，即使收錢分分鐘都唔夠買驚風散，玩「讓客」又太進取，所以齋捧阿仙奴似乎唔太划算。
卡城靠高空轟炸搵食

對家卡迪夫城嘅實力係就係輸畀「廠仔」一大截，但佢哋今季主場出擊都幾得人驚，季初試過喺曼城同愛華頓身上搶到分，對住熱刺亦只係臨天光失守，到咗上星期，卡城仲爆出大冷門，同曼聯打成2:2平手，除咗話球員信心大增，亦都睇得出呢班波嘅後勁唔講得笑，連番不斷嘅高空轟炸，搞到「紅魔鬼」出盡洋相，一對箭頭費沙甘保同奧丹維治都係極速老鼠仔，梅迪薩卡同哥斯尼兩碌杉嘜唔嘜得住佢兩個係一大問題。既然兩軍都有一定鋒力，咁梗係玩好分啲嘅入球大啦！
Data King 奧丹維治鬥兵例入波

‧阿仙奴近11次鬥卡迪夫城錄6勝5和。

‧奧丹維治喺英超3次正選鬥阿仙奴入2球。

‧卡迪夫城係英超被對手起腳次數最多嘅球隊（75次）。
大細中位數調整

由今周賽事開始，部分球賽會因應情況開出有兩個球數嘅「半場入球大細」同「入球大細」項目，即係除咗以往慣常嘅2.5球同3.5球，有時會有諸如2/2.5球或3/3.5球等，將投X人仕嘅注碼平均分去2個盤。