紐卡素團結搶W有好「布」

猪拉多纳

紐卡素連贏3場升上英超第8位，有力衝擊下屆歐洲賽。佢哋今晚主場恭候連續2仗被對手逼和西布朗，要贏多場唔難，1.88倍主勝值得支持。

（now621周日凌晨1:30直播）

紐卡素早前分別砌低車路士同熱刺，家陣成班波都信心爆棚，借將射手雷米仲着晒火，連續3仗有波入，難怪主帥柏杜都話會勸掂高層，盡早買斷呢位昆士柏流浪前鋒啦！仲有，季初諗住走人嘅中場核心卡比耶，日前又表明出年都唔會離隊，有助穩定軍心搶W！

西布朗上仗對維拉早早取得2球領先優勢，可惜最終畀對手追和，咪話唔打擊士氣。況且守將比利鍾斯、門將賓科士打續抖，防線天殘地缺，叫人點捧得落手吖！