「黑貓」作客腳軟撐維拉W

猪拉多纳

「黑貓」新特蘭開季戰績認真唔掂，係今季英超最快炒主帥魷魚嘅球隊。雖然佢哋早前搵咗烏拉圭籍嘅普耶取代迪肯尼奧擔任領隊一職，仲即時見到成績有多少好轉，可惜係佢哋作客不濟情況依然冇變，呢支包尾大幡今晚造訪阿士東維拉，睇怕又係難逃一敗，捧1.85倍主W夠晒穩陣啦！
作客5連敗失13球

「黑貓」上場聯賽作客史篤城淨吞兩蛋，後衞布朗被球證屈佢粗野剷低主隊中場查理阿當，仲送咗張紅牌畀佢。好彩最後上訴成功，布朗沉冤得雪，今晚可以繼續上陣。不過講真，就算有呢位前曼聯守將復出，又幫得到球隊條豆腐防線幾多？事實上，佢哋開季12場失咗24球，係全英超最差，如果單計作客波仲得人驚，近排已經係連輸5場失13球，當中近4場仲要係全部入唔到波，正所謂攻不銳、守不穩，今晚輸少當贏啦！

另邊廂嘅維拉12戰取得15分，雖然只係排喺積分榜第12位，但相比起「黑貓」已高出一大截。維拉季初時係威係勢，先後擊敗過阿仙奴同曼城兩支勁旅，對車路士同利物浦亦都只係輸一粒，雖則話之後表現有啲回落，但近3場聯賽表現又有番啲起色。上場英超佢哋對住西布朗，雖則半場落後2球，喺易邊後發力逼和西布朗2:2，盡見頑強鬥志。相信今晚佢哋擁有埋地利，要擊敗榜尾嘅新特蘭應該易如反掌啦！