紅軍曼城讓波未驚過

猪拉多纳

今晚英超除咗頭場熱刺對曼聯，聯賽第2至4位球隊稍後時間亦會分途出擊，第2位嘅利物浦作客鬥侯城，紅軍「SAS」鋒線組合雖有史杜列治因傷上陣成疑，但蘇亞雷斯今季亦已合共攻入９球，包括近兩仗入３球，最重要係球隊已洗脫過往「海鮮味」，今晚作客侯城又係時候數胡。侯城上仗主場鬥升班球隊水晶宮都要輸，試問點頂利物浦強攻，捧2.35倍讓球客勝。

（now 622周日晚10時05分直播）

至於第4位嘅曼城主場鬥史雲斯，曼城今季主場聯賽6戰全勝攻入26球，霸氣盡顯。史雲斯剛於歐霸盃輸波兼折將，前鋒韋菲特邦尼受傷抖數周，加上米捷未傷愈，缺少一對正選箭頭難有反撲之力，捧讓球主勝。

（now 623周一凌晨零時05分直播）
車仔冧偈待「修」

至於聯賽榜3哥車路士主場鬥修咸頓。近日有英國傳媒報道修咸頓為激勵士氣，特別為球員度身訂造大床，同時又為球員另一半送上生日卡，令球員更有歸屬感，難怪聖人今季成績咁理想。車路士上周中歐聯作客瑞士巴素利輸波疲態畢露，冧冧地偈之下就算有主場之利都難大勝，首選細盤。

(now 621周一凌晨零時10分直播）