熱刺輸到慌 頂唔住紅魔

猪拉多纳

近12次主場對賽未贏過

正所謂寧買當頭起，啱啱喺歐聯大勝利華古遜嘅曼聯，今晚回師英超又遇到佢哋嘅「御用搶分器」熱刺，仲要撞正後者上周畀曼城炒咗鑊甘，成班波軍心散晒，紅魔就算作客，但要贏又有幾難？更好消息係曼聯今晚有「熱刺剋星」尹佩斯復出掛帥，足智彩開平手盤，力奇撐1.88倍嘅曼聯！

（now621台周日晚8:00直播）

曼聯同熱刺近排走勢一個天、一個地。「紅魔鬼」已連續11場不敗，贏過「一哥」阿仙奴，周中歐聯仲大炒利華5蛋，主帥莫耶斯仲寸到話呢場係佢哋今季代表作添。佢哋上周聯賽臨尾畀卡迪夫城逼和，今鋪睇怕唔會再咁大意啩！事實上，曼聯自從2001年開始，近12次喺聯賽造訪白鹿徑，錄8勝4和佳績，同喺主場出擊冇分別。
費蘭尼刑滿 尹佩斯傷愈

人腳方面，除咗「爆炸頭」費蘭尼刑滿，莫耶斯前日記招又表明射手尹佩斯同隊長尼曼查維迪康復進度理想，今晚有望復出。要知道尹佩斯之前代表阿仙奴，對上8次對熱刺就取得6個入波同5次助攻，真係鋪鋪等開餐。加上佢前線拍檔朗尼同香川真司都弗到冇朋友，梗係信得過啦！

熱刺上星期慘敗畀曼城0:6，已經連續3場聯賽不勝，今次再遇另一支曼市球隊都咪話冇陰影。領隊保亞斯近排陷入信任危機，隨時要食無情雞。雖然呢位葡萄牙籍主帥堅稱董事局同球迷都撐佢，但一旦再輸多1、2場，董事局仲有冇耐性真係好難講。
熱刺艾歷臣 丹尼路斯打柴

係，雖然熱刺周中喺歐霸盃作客挪威輕勝特林素2:0，只不過對手實力有限，根本唔可以作準。咪忘記佢哋件中場指揮官基斯甸艾歷臣同左閘丹尼路斯都仲養緊傷，陣容唔完整，想話守到完場？睇怕好難囉！