殘車撞鐵桶 「讓球和」啱數

猪拉多纳

修咸頓作客唔識攻

英超「神奇球隊」修咸頓今季表現令人刮目相看，開季至今12戰只失7球全英超最佳，帶挈多位新星冒起入選英格蘭國家隊。唯一要挑剔，係班前鋒去到人哋地頭就腳軟，今晚造訪史丹福橋想全身而回相信幾難，但車仔想大炒「聖人」都唔容易，車仔讓波，3.4倍「讓球和」值得一博！

修咸頓今季成績出眾，關鍵係佢哋有一條鐵桶防線，如果唔係對史篤城嗰陣，對方門將比高域有怪風幫手大腳破網，同埋上場對阿仙奴時門將保路錫對住基奧特玩嘢玩出禍，修咸頓仲可以失少2球添！就連兵工廠領隊雲格都識英雄重英雄，大讚修咸頓表現出色，今季有機會爭奪前4咁話。
「聖人」作客入得4粒

不過有讚就要有彈，咪睇「聖人」今季作客6戰勝和負各2，不敗率有近66%好似好叻，查實佢哋今季嗰7個失球當中，有5球都係嚟自客場，而且班波聯賽作客只係入得4球，今晚對住聯賽主場5勝1和，每場最少入2粒嘅車仔，睇個勢都係似一場攻防戰，但齋守可以守得幾耐吖？小妹怕修咸頓好大機會衰收尾，僅負1粒。
車仔靠費托孭飛靠唔住

車路士周中歐聯作客瑞士巴素利以0:1落敗，唯一可取嘅就係拎到出線權。論實力，佢哋當然係爭霸分子，但主帥莫連奴好似一直未搵到最佳陣容，表現始終有多少反覆。最慘係射手伊度奧喺上仗歐聯整親，今晚未必踢得，前線要搵傷愈冇耐嘅費蘭度托利斯孭飛，睇佢上仗後備入替踢咗半場多啲，狀態唔算好Sharp，就算話車仔主場夠惡，但今晚要大炒「聖人」真係幾難。