多蒙特德國盃獻細

猪拉多纳

德甲歐聯關鍵時刻忙到嘔

德國盃第三圈今晚直播賽事係德丙沙貝魯根主場挑戰多蒙特，呢場波牌面強弱懸殊，不過多蒙特目前喺德甲同歐聯兩條戰線忙到嘔，加上傷兵滿營，今晚作客冇可能全力搏殺，去到出名狂熱主場嘅老牌球會沙貝魯根好難大炒，大細中位數調整到3.5球，推介1.85倍細盤。

（無綫翡翠台周三凌晨3時30分直播）

多蒙特原本喺歐聯同德甲都處於極艱難逆境，全賴過去一周分別擊敗拿玻里同緬恩斯形勢至好轉，但呢個所謂好轉只係未斷氣，正如教練高普喺上周末聯賽擊敗緬恩斯後，立即話球隊仍然生存但不能鬆懈，而未來一周佢哋先喺聯賽硬撼二哥利華古遜，跟住下周中歐聯作客馬賽，兩場都係非勝不可，事旦和一場後果都好嚴重。

「蜜蜂兵團」目前傷兵滿營，蘇保迪、侯姆斯、舒姆沙同根度簡繼續養傷，連中場三名大將施雲賓達，馬高列奧斯同巴拉斯塞高斯基對緬恩斯都踢唔足，高普賽後話佢哋有微傷同疲態，今場德國盃嘅重要性遠不如嚟緊兩場，相信高普都唔敢冒險，隨時畀機會年輕球員，贏咗就算，避免浪費氣力同增添傷兵。

沙貝魯根屬老牌球會，佢哋嘅Ludwig Park Stadium更係出名嘅狂熱主場，一向畀客軍巨大壓力，呢班波多年嚟喺德球壇大起大落，50年前德甲第一個球季佢哋已經參與，之後係各級別浮浮沉沉，08至09年更曾因財困淪落到第5級別聯賽。
沙貝魯根門將夠卡士

目前佢哋排喺德丙尾二，但主因係前度主帥龍真格季初領導無方，球隊九月中換帥改由沙錫任教後已有起色，近10場正式賽事只輸兩仗，球隊最值得留意嘅球員首推曾効力哈化柏林同紐倫堡嘅高大門將添姆奧查斯，呢位身高1米89嘅門神級數喺德丙超班，今晚會係多蒙特入波嘅最大障礙。
Alwin 推介

漢堡大★★★

史浩克04大★★★

沙貝魯根細★★★