宮斯餐半場食蛋多

猪拉多纳

今晚英超獨腳戲，包尾大幡水晶宮喺主場迎戰「錘仔」韋斯咸，水晶宮新帥佩尼斯出晒名踢悶蛋足球，依家搶分要緊更會專注防守，遇上同道中人嘅「大Sam」艾拿戴斯麾下嘅韋斯咸，雙方初段定必鬥穩陣，半場和值得捧場。

（now 621周三凌晨4時直播）
水晶宮韋斯咸搶分至上

以往佩尼斯執教史篤城嗰陣，其防守至上及硬碰硬嘅殺傷戰術，畀人寸好似打欖球，但佩帥呢招的確令球隊喺英超企穩陣腳，你都吹佢唔脹。依家佢接手水晶宮，一定先搞好後防慌失失問題，上仗僅輸諾域治一粒，首度領軍嘅佩帥就排出保守嘅４４１１陣式，擺明為咗護級搶得一分得一分，相信今仗仍以守行先，前線得查馬克單打獨鬥，唔好期望有乜作為。

對手韋斯咸亦非擅攻球隊，領隊「大Sam」艾拿戴斯一向只求分數，不求好睇，當年執教保頓嘅高Q大棍打法，亦順勢移植到「錘仔幫」，睇番佢哋今季七仗作客賽事，當中有五場半場互交白卷，證明「大Sam」作客一定縮住嚟踢，預料雙方隨時合演一場悶波，唔慌多波入，1.97倍嘅半場和熱得有道理，不妨考慮埋入球細。