何良騎師賽夜演「好」戲

猪拉多纳

　　之前兩屆國際騎師錦標賽，都係場場跑1650米，唔知道係因為咩原因劃一路程，出意係點都好，有呢個安排，用意都係想好。點知，今屆無端端郁一郁，整場最短途夾喺中間，忽然有此轉變，用意何在呢？令人費解，唔通今年編唔到多1場一哩賽。

　　咁點解一定要揀場1000米，而唔係跑1200米，如果怕有偏差，不如以二班1800米取代，嗰場點都好睇過第七場啩，話晒谷中1000米，「咋」一聲就到終點，成班大牌騎師唔會有幾多時間顯露身手，反而跑長途唔同，走位及鬥後勁，夠晒時間發揮。講開呢一夜，華倉之中，何良係其中一個鍾意喺騎師錦標賽搏馬嘅馬房，上屆已有「魅力星」帶挈到莫雷拉稱王。今次佢個馬房派馬幾多，有7駒出戰，除咗睇淡頭兩場，其餘要睇實。

　　第五場「海南花梨」，之前贏完演出走樣，何廐成日有呢個問題，唔會當係咩一回事，隔一場重現實力，一啲都唔奇；第六場「萬眾期待」，搏來搏去未贏到，實力唔係冇，呢啲曾經流過鼻血嘅馬，跑得而加程配合，唔會留力；第九場「好先生」，好耐冇贏，未肯退役，都係想做番齣好戲，搵得巫斯義出馬，擺出搏殺格。