回師谷中舖舖順

猪拉多纳

　　今期谷中賽事，有２個馬膽係揀方仔馬，唔係阿棟特別喜歡呢個馬房馬，你知我份人，有句，講句，一睇個馬房出馬表，方仔出馬多，仲要好多係有用子彈，呢次唔係大搏殺，真係搵人信都難，唔吼到實一實，我驚會走寶。

　　第四場三班1200米。「舖舖順」前一場初出即刻贏馬，冇錯，當時係贏在形勢，但要知道，記憶中唔多方馬一出贏得到，另外，上次隻馬轉到大場，加程而戰唔係跑得差，返到谷中仲唔變番巨人。

　　要擔心係「舖舖順」由1400米縮回1200米，好在方仔幫佢加眼罩作輔助，希望透過配備可克服到轉路程問題。再睇埋隔晚飛，4倍左右，有墊底飛落，比較放心。

　　第八場三班1650米。「方程式」上次已經有提供，後上入Q走勢強勁，輸畀隻狀態大勇「帝聖駿駒」，老土咁講，真係非戰之罪。連跑兩場之後，今次加程出戰，應該更加合腳法，但我驚佢追唔切，因為跑法唔夠靈活，惟有寄望A跑道有得追。

　　格哥兒試準跑法

　　第九場二班1800米。「格哥兒」後上跑法試過，跟得前又試過，邊一種跑法最適合呢匹馬，賀賢一定心中有數，今次搵得柏寶，相信早段唔會擺前面，一條心留留埋埋，直路同對手鬥後勁，我亦覺得「格哥兒」採用呢種跑法會係最有威力。而呢匹體重約一千磅重馬，負重磅點都有影響，上二班跑，負磅輕番，點都係好事，賠率有得分，可以買WP。