魔王莫耶斯絕情割愛

猪拉多纳

倒戈之夜冇面畀

英超快車重頭戲曼聯主場迎擊愛華頓，「紅魔鬼」主帥莫耶斯帶領「拖肥糖」十一年間贏盡口碑，今次掉轉槍頭打舊主，昔日恩情要統統擺埋一邊！莫帥連同防中費蘭尼及射手朗尼組成倒戈三人組，誓要助「紅魔鬼」贏波改善爭標形勢，一於熱捧主勝！

（now 621周四凌晨3時45分直播）

莫耶斯02年由普雷斯頓轉投愛華頓領軍，當時只屬蛋散，冇人識佢！佢帶領「拖肥糖」長達十一年，任內以蔗渣價錢組軍踢出燒鵝味道，贏得曼聯傳奇教頭費格遜賞識，今夏一躍成為「紅魔鬼」領隊，聲價十倍。現時愛華頓骨幹成員大部分都係「莫家軍」成員，莫耶斯對班舊將可謂瞭如指掌，就連新星巴克里都係莫帥一手培育成材，又點會唔知有幾多斤両啦！

曼聯上輪對熱刺又失分，現時已被榜首阿仙奴拋離九分，話就話聯賽係長途戰，但畀人掟甩成條街都幾難追。「紅魔鬼」今戰中場中路缺人，菲爾鍾斯要停賽，卡域克仲傷緊，湯卡華利要繼續擔正，而爆炸頭費蘭尼加盟後冇場好睇，呢次倒戈係時候踢爭氣波。至於射手尹佩斯有傷上陣成疑，好在朗尼近期弗到癲，佢都會掉轉槍頭鬥舊會，條友仔肯定唔會懶懶閒啦。
主場誓宰愛華頓

愛華頓換帥後保持穩定發揮，前線由「新魔獸」盧卡古一個打晒，成班中場都係打仔，好鬼搶得！不過，「拖肥糖」左閘巴尼斯受傷休戰，冇咗佢隻黃金左腳處理死球，少咗瓣進攻板斧，作客偷雞本錢大減。翻查往績，曼聯近七次聯賽主場對愛華頓取得六勝一和，淨係試過前季贏住兩粒喺尾段大意被逼和，家陣風頭火勢，班兵唔敢玩嘢，打真軍可望拎晒三分！
領隊Chit Chat

莫耶斯(曼聯)：球隊戰績未如理想，但球季流流長，我認為班波仲有空間改進，呢點係不容置疑。未來八周有好多比賽，期待可以取得佳績啦！

馬天尼斯(愛華頓)：我知領隊呢個話題係唔少人嘅焦點，但踢波唔係齋講領隊，仲要睇埋球員嘅。我哋會盡力挑戰上季冠軍，最重要係喺比賽中踢返自己風格！

普耶(新特蘭)：對我嚟講，對手係車路士感覺特別深，雖然我喺車路士度過唔少美好時光，不過今場目標係攞三分，我哋全隊都進步緊，有信心可以愈踢愈好。

莫連奴(車路士)：我哋嚟緊兩場作客對新特蘭、史篤城，然後返主場鬥水晶宮，由於對手排名比較低嘅關係都要搶分，所以我哋呢三場比賽肯定唔易應付。