普耶鬥莫帥黑貓拆車

猪拉多纳

另一場英超倒戈之戰，普耶率領新特蘭主場鬥車路士，呢位烏拉圭名宿球員時代曾於車仔度過4個年頭，立功無數，轉執教鞭一樣有料到，幾乎將昔日甲組仔白禮頓帶上英超，堪稱「魚腩救星」。普耶10月初接掌「黑貓」帥印後，於光明球場三戰全勝，包括擊敗曼城，絕對唔嘢小，唔驚冇霸氣嘅車仔，新特蘭受讓值博。

（now 623周四凌晨3時45分直播）
車路士踢殘冇霸氣

論教波資歷及戰績，無可否認普耶比唔上莫連奴，但佢4年領隊生涯，其實都唔失禮，09年11月臨危受命首執教鞭，就成功為當時千瘡百孔嘅甲組球隊白禮頓止血，第二季更以冠軍身份升上英冠，上季僅於升班附加賽不敵水晶宮，同英超席位擦身而過。普耶將化腐朽為神奇嘅力量，帶到新特蘭，三次主場出擊贏晒，而且對手係現時排前七位嘅紐卡素、修咸頓及曼城，「含金量」十足，今仗「鬥車」，並非冇得打。

另一邊廂，莫連奴重返車路士後，霸氣不及當年，不時陷於苦戰，上仗都係落後之下，靠兩位中堅加利卡希爾及泰利入波，勉強反勝修咸頓。車仔最大問題係缺乏一位可靠前鋒，費托水準飄忽，丹巴巴亞不受重用，伊度奧有傷在身，依家連後上殺手奧斯卡杜斯山度士都傷埋，攻力更令人擔心。事實上，車仔兼顧歐聯之下，球員踢到殘，應付英超快車，肯定吃力，未必咬得入新特蘭。