阿仙奴紅軍夠鑊氣

猪拉多纳

打虎捉雀炒得就炒

兩支傳統勁旅阿仙奴同利物浦周中快車將分別喺主場對戰牌面較弱嘅侯城同諾域治，「一哥」阿仙奴近期氣勢如虹，近三場皆淨勝對手兩球或以上，今仗更有主場之利，讓球主勝值得捧場。至於啱啱歷史性輸畀侯城嘅利物浦返到主場就梗係要搵「金絲雀」嚟出氣，但由於主W太熱，而且今季嘅紅軍入波多時亦失波多，度士建議轉捧大盤﹗
兵工廠足料炸侯城

季前冇人估到阿仙奴依家排喺聯賽第一，力壓曼聯、曼城、車路士等熱門，但其實綜觀咁多隊，今季嘅阿仙奴係最應該排榜首，皆因兵工廠係今季變動最小嘅一隊，曼聯、曼城、車路士全換領隊，利物浦同熱刺又買咗好多人，新帥未執好隊波，新兵又未磨合好，成績自然不穩。反觀阿仙奴領隊雲格喺英超係執教最耐領隊，今季人腳變動又不大，一班骨幹如基奧特、阿迪達、韋舒亞、禾確特、梅迪薩卡等夾慣夾熟，買入嘅頂級中場奧斯爾踢法同兵工廠勁合拍，「重返娘家」嘅硬淨防中法米尼更係熟晒雲格嘅戰術，雲格手上有呢班精兵在手，成積自然穩步上揚，今仗要贏兩球並唔難。「老虎」侯城上場爆冷贏利物浦，但其實只係虛火，強隊如車路士、曼城、熱刺都曾打低呢隻「紙老虎」，今仗作客更係冇得打。

（now 622周四凌晨3時45分直播）
利物浦大起諾域治

近期頻頻失分嘅利物浦喺主場對「金絲雀」諾域治，紅軍上場爆冷輸波，但自領隊羅渣士接手紅軍後就從未試過喺聯賽兩連敗，度士今場睇好佢反彈，但由於主W熱到得1.18倍，改捧入球大，因為「金絲雀」堪稱係紅軍嘅「私家雀」，近三次對碰紅軍均大炒對手三球或以上，上場輸波嘅紅軍梗係要搵呢隻雀嚟出氣喇！而且紅軍喺羅渣士帶領下攻強守弱，入得又失得，近兩仗失咗六球咁多，今仗都係捧大啱數。

（now 624周四凌晨3時45分直播）