曼聯大舉追卡數

猪拉多纳

倒戈戰跪低 莫耶斯發茅

曼聯喺後費格遜時代不再霸道，剛過去周中於奧脫福不敵愛華頓屬另一鐵證，今輪續於主場對紐卡素亦無必勝把握，隊中弗爆射手朗尼要坐波監，令「紅魔鬼」陷入困局，主勝偏熱博唔過！領隊莫斯耶急於搶分收復失地，無論齊唔齊人都要搶攻，面對防線不穩嘅「喜鵲」，呢場玩大盤啦！

（now 621周六晚8時45分直播）

無論幾唔願意都好，曼聯迷都要接受呢班波已經唔係昔日也文也武嘅惡爺，冇咗權傾英超嘅費Sir領軍，唔好再望佢哋爭標喇，不如實實際際將目標改為打入前四奪取歐聯席位啦，始終落後榜首阿仙奴十二分真係好難追，由依家開始專心睇實個四哥位，「紅魔鬼」比第四位利物浦少五分，若然生生性性，都唔係冇得追嘅。
進攻分散更難防

唔少曼聯球迷批評領隊莫耶斯唔識調兵遣將，今次大軍缺少朗尼，另一箭頭尹佩斯報稱有傷在身，前面睇嚟都幾大鑊。不過，查維亞靴南迪斯同韋碧克等後備箭頭都有貨交嘅，家陣冇咗進攻重心，咪將進攻點分散囉，隨時仲難防添。相比之下，「紅魔鬼」後防更令人擔心，佢哋近三場聯賽失五粒，未必頂得住紐卡素尖刀雷米。
紐卡素門將有排忙

紐卡素喺周中快車期前連贏四場，砌低實力分子熱刺同車路士都係靚績，但上次作客史雲斯竟淨吞三蛋，大家要留意一點，史雲斯係缺少兩大射手米捷同韋菲特邦尼，「喜鵲」咁都失三粒，後防堅曳！今場對手由前線唔齊腳嘅史雲斯換成鋒線不整嘅曼聯，點計都係難踢咗，睇怕紐卡素門神告魯爾陣上有排忙，一於吼大啦！

莫耶斯(曼聯)：我認為近呢幾場球隊嘅表現一啲都唔差，只係冇運，今季攞唔到聯賽冠軍都唔係世界末日，只要入到前四都唔差呀！

柏杜(紐卡素)：賓艾化今場可以出戰對曼聯，對球隊係一大好消息，而另一好消息就係朗尼停賽，球隊要把握呢個好機會擊敗曼聯。