水手衝冠大作戰

猪拉多纳

贏即封王作客前鋒搏到盡

都話咗日職係鍾意去到最後一輪先爭冠軍喇，仲要搞到個形勢七國咁亂至刺激！依家就係頭六名互相廝殺，三場直播，又係揸住個有線遙控掣撳到爛嘅日子。妹頭就唔敢講邊隊捧盃喇，但求場場鬥得燦爛、峰迴路轉，好睇就得！

依家爭標形勢好微妙吓，無錯主動權都仲係喺榜首嘅橫濱水手度，但佢哋今日作客對手川崎前鋒，咁啱又係要爭亞冠盃入場券，所以一定唔會咁易放過水手。若果水手只能打和，而排第2嘅廣島三箭又擊敗鹿島鹿角嘅話，屆時雙方雖然同分，但三箭可憑較佳得失球差壓過水手，冠軍獎盃即時過戶。

講番水手，妹頭上星期有睇佢哋主場對新潟天鵝場波，雖然冇揸流攤，但攻極唔入轉頭就輸個突擊玩完！今場佢哋力求提升安全系數，務必要喺賽事初段搶攻有士哥，一班元老好似中村俊輔、中澤佑二等唔使教練落柯打都必定明白。
大久保嘉人爭金靴搶士哥

今日主場出戰嘅川崎前鋒已經三連勝，陣中前鋒大久保嘉人喺射手榜領先，如果今日再有波入，就極有機會坐正今年神射手寶座。今日係陣中老大哥伊藤宏樹退休前最後一戰，隊友實幫手等佢留番個美好回憶。咁多複雜因素加加埋埋，同時間又幾場波互相影響，主客和好難揀啫！所以要入球大，一於等睇好波。

（有線62台周六下午2時30分直播）