落Order喪攻喜鵲 紅魔「大」打翻身戰

猪拉多纳

莫耶斯心急保飯碗

紅魔、喜鵲合演翻身「大」戰！曼聯今晚會喺英超主場惡鬥紐卡素，主隊已經連續3場英超不勝，聯賽排名比「喜鵲」仲要低，領隊莫耶斯依家飯碗難保，為咗挽回面子定會吩咐班兵搏命。紐卡素上仗慘吞史雲斯3蛋亦谷住一肚氣，肯定出十成功力同紅魔死過，1.54倍入球大梗係趁熱食啦！

（now621台周六晚8:45直播）

今季曼聯喺莫耶斯帶領下，瘀事真係一單接一單，先係開季6輪創下24年嚟最差開局，之後35年嚟首次喺主場輸畀西布朗，同14年嚟第一次喺主場對修咸頓失分，啱啱周中仲連喺自己地頭鬥愛華頓21年不敗嘅金身都慘被打破，所以唔少紅魔躉都想高層炒領隊莫耶斯魷魚！
吞史雲斯3蛋 紐記要出氣

小妹唔敢肯定曼聯今晚可以一吐連續3輪英超不勝嘅烏氣，但上仗落敗後，被逼到絕境嘅莫耶斯已經親口承認球隊「再冇犯錯嘅空間」，老大哥傑斯亦都走出嚟叫隊友重新振作，曼聯球員收到「柯打」梗要做嘢，韋碧克同查維亞靴南迪斯兩位射手質素唔曳，而且難得可以趁朗尼同尹佩斯缺陣齊齊擔正，自不然要爭番啖氣啦，對住近3場都有失波嘅紐卡素，要入波照計唔會太難。

論近況，近5戰贏4場嘅紐卡素絕對比曼聯優勝，相信佢哋眼見咁多中下游球隊都成功喺奧脫福球場搶分，今仗都會去到盡嘗試砌低對手，況且「喜鵲」上仗淨吞史雲斯3蛋，照計會同「紅魔鬼」一樣想打番場好好睇睇嘅翻身戰。曼聯近10場英超得1場冇失波，紐卡素嘅高法蘭同雷米絕對有機可乘，今晚「夢劇場」開硬入球騷！
Data King 紅魔地頭出擊 少連輸兩鑊

紐卡素近29次作客曼聯輸21場。

曼聯守將艾拉、莊尼伊雲斯上季兩鬥紐卡素都取得入球。

紅魔鬼自從2002年5月後，未試過喺主場取得聯賽2連敗。