「幼齒艦隊」炒硬丙組仔

猪拉多纳

「Baby Madrid」西盃出籠！皇馬未來12日要踢4場波，首個挑戰就係今晚喺西盃第4圈造訪奧林比薩維亞，就算教練安察洛堤決定派遣以艾華路莫拉達為首嘅小將出戰，要大勝「丙組仔」奧林比薩維亞依然綽綽有餘，皇馬讓到2球，都可以照捧1.9倍「讓球客勝」。

（now632台周日清晨5:00直播）

奧林比薩維亞家陣喺西丙排前列，但講到戰鬥力梗係輸「艦隊」幾條街啦，所以皇馬教頭「肥安」就把握機會畀班主力休息，包括要响盃賽停兩場嘅C朗，計劃派上緊位嘅中堅拿祖費南迪斯、中場伊拿拉文迪、卡斯米路、鋒將謝斯洛迪古斯同莫拉達擔正。
莫拉達可擔大旗

西媒用「Baby Madrid」嚟形容呢支「艦隊」，但亨格比利覺得就算「Baby」都夠照啦，畢竟伊拿拉文迪同莫拉達已經夠晒班喺西甲立足，當中莫拉達上月底鬥艾美利亞球靚絕挑射相信大家都記憶猶新，呢班「Baby」為爭上位肯定搏晒命都似。

主隊奧林比薩維亞賽前拍片造勢，講吓佢哋點樣喺街頭巷尾備戰今場波，但截至尋日為止，拿梅達球場仲有成千幾二千張波飛賣唔出，好似冇乜人撐場喎！最弊係哥倫比亞中場莫斯基拉足踝受傷唔出得，即使响個人造草主場出擊，今鋪想輸少球都難啦！