紅魔將帥不和繼續反

猪拉多纳

曼聯於歐聯A組最後一輪主場對薩克達，再添一分即可鐵定首名晉級，不過「紅魔鬼」深陷信心危機，將帥之間互不信任，隊內氣氛極曳，絕對冇本錢讓波，蘇豪認為呢場可試讓球客勝！

（有線64及203台周三凌晨3時45分直播）

曼聯於莫耶斯領軍下低處未算低，近兩次聯賽主場出戰踢來完全冇氣勢，輸得都幾難睇。守將莊尼伊雲斯公開表示班球員確係冇乜信心，波可以輸，信心點都唔可以輸！今次射手朗尼可候命，尹佩斯亦踢得，但球隊戰績曳根本唔關齊唔齊人事，班友踢到患得患失，唔係一時三刻可以大變身。

「紅魔鬼」球星里奧費迪南近日高調話唔鍾意莫耶斯太遲公布正選陣容，而莫帥排陣五時花六時變，一時用贊奴沙、拿尼，得閒又畀路爾斯華倫西亞同艾舒利楊格落場，班波本身已經唔係弗，仲要變來變去，難怪進攻效率奇低。
薩克達爭出線砌盡

薩克達目前有八分在手，僅領先第三位利華古遜一分，今場要贏波先可以穩奪出線席位，而曼聯已經肯定出線，今場唔輸就會首名晉級，論鬥心薩克達一定較佳，受讓值得一試。