阿仙奴強勢持續 周六闖城有睇頭

猪拉多纳

今季英超最令人驚喜嘅球隊，相信好多球迷都會答係「兵工廠」阿仙奴，季初點會估到8年冇盃落袋嘅佢哋打咗接近一半聯賽，仍然壓住群雄排喺英超榜首。諗番起以前聖誕節未到，雲格就已經話投降話目標爭前四，今年真係守得雲開見月明。今集《球分》就會同大家講下阿仙奴啦！

（now 101周五晚10時30分直播）

其實近來順風順水嘅仲有曼城，聯賽主場長勝唔在講，而且仲喺歐聯作客打敗上屆盟主拜仁，真係威過威士忌。曼城近來愈打愈好，最主要原因當然係尼格度同阿古路兩位着咗火嘅前鋒，查實除咗佢哋外，其他球員都愈打愈好，所以作客拜仁就算冇出佢兩個都可以反勝。

老實講阿仙奴始終都係中前場畀人嘅信心多於後防。今周到訪主場全勝嘅曼城，只要前線基奧特交到貨，阿仙奴一樣有爭勝本錢，各位英超迷冇理由錯過呢場入球騷。

（now 621周六晚8時45分直播）