彭杜歷交完學費攞成績

猪拉多纳

Macot較早前因私務暫別歐陸連線呢個欄，久別重臨當然要畀心機搵番啲好料，今晚揀咗場例行公事，E組榜尾球隊羅馬尼亞彭杜歷主場迎戰尾二嘅葡萄牙費利拿，兩軍已經肯定出局，不過彭杜歷係處於升勢中嘅小球會，對於爭取歐霸盃唯一勝仗充滿熱誠，相反費利拿一沉不起，已經跌到葡超包尾位置，有力都留番踢護級戰啦，呢場毫無意義嘅作客賽事真係睬你都傻，Macot撐2.1倍彭杜歷主勝。

（周五凌晨2時開賽）
費利拿留力葡超

E組擺明兩強兩弱格局，費倫天拿同迪尼普晨早篤定齊齊出線，剩低呢兩隊水鬥水，彭杜歷喺十月初作客葡萄牙都可以摸和費利拿，足見佢哋實力唔輸蝕，呢支新興隊伍在進步中，目前已經喺羅甲排到第四位，主場更加愈戰愈勇，近兩場羅甲主場賽事先和班霸布加勒斯特隊，跟住大炒克魯日大學，球員平均年齡輕，接連取得好成績當然心頭高，今次係球會史上首次參加歐霸盃賽事，教練佩斯泰賽前揚言矢志要贏得首場歐洲賽事，戰意高昂。

講經驗，費利拿比彭杜歷好，但聯賽包尾明顯當揼，近3場正式賽事都冇波入，會方又冇錢買人，呢個時候有力都留番周末聯賽對國民隊搶分護級，今晚仲邊有心機同你搏？
Macot推介：

彭杜歷勝 ★★★★

薩格勒布戴拿模勝 ★★★

標準列治大 ★★★