哈化無後顧撲殺不來梅

猪拉多纳

防線超穩陣唔驚反擊

德甲獨腳戲哈化柏林主場對雲達不來梅，主隊今季成績比預期更好，今仗係佢哋首循環兼2013年嘅主場謝幕戰，門票銷情熱烈，預期有逾七萬球迷入場，力足攻破近況低沉兼防線大穿窿嘅不來梅，推介2.28倍讓球主勝。

（有線61及201台周六凌晨3時30分直播）

哈化目前排聯賽第7位，雖欠缺頂級球星，但攻守平衡，教練盧侯卡爾上季已打造出一條穩健防線，係德乙失球最少球隊，今季回升德甲，至今15場聯賽只失17球，僅比拜仁、利華、多蒙特同禾夫斯堡多，而且所失17球當中，冇一球係輸反擊，可見佢哋防線結構幾咁嚴密，後防領袖盧斯頓貝加大熟大勇，前面仲有掃蕩力極強嘅細貝萌做第一道防線，要攻入佢哋真係唔容易。
不來梅近6仗失22球

哈化唔怕人反擊，本身就係反擊專家，佢哋弱點係中場創造力較弱，主場面對防守型球隊經常都咬人唔入，好在今仗對手不來梅防線曳到爆，近6場聯賽勁失22球，上仗主場畀拜仁炒完7粒，教練杜特賽後話要苦練防守，但球隊自從中堅普特爾受傷後就散晒，狀態唔錯嘅防中菲歷斯卻奧斯因傷缺陣，隊長兼右閘富斯前日操練中受傷，加埋中場肯特患感冒，今場就算不來梅想主守都力有不逮，哈化贏兩粒難度唔高。