曼城主W佔仙機

猪拉多纳

最尖之矛狂插最堅之盾

英超頭場由聯賽榜第4位曼城主場挑戰榜首阿仙奴，力圖贏波以收窄積分差距。而今仗看點不單止係前列大戰咁簡單，因為曼城今季主場錄得全勝，士哥數字目前又雄踞英超No.1，「主場王」同「進攻王」都係佢哋；至於「兵工廠」作客只輸過1場，失球數字則係英超最低，同樣身兼「作客王」同「防守王」，因此令呢場最尖之矛強攻最堅之盾之戰更加矚目。不過考慮到曼城有關鍵先生阿古路壓陣，打大戰冇甩拖，有力攻破阿仙奴防線，睇好主W！

（now 621周六晚8時45分直播）
阿古路入波超高效

曼城主場不嬲好勁，今季改由比歷連尼領軍後勁上加勁，聯賽主場7戰贏晒，瘋狂轟入29球，每場最低消費都淨勝兩粒，代表作包括4比1大炒死敵曼聯，以及上月尾6比0狂數實力分子熱刺，呢張成績表只能用「誇張」兩字嚟形容。曼城今季英超15戰轟入41球，進攻火力係聯賽最強，遇着阿仙奴話之你係一哥，仍會繼續喪攻。

曼城能夠喺大戰贏到開巷，真係要多得王牌前鋒阿古路，佢今季各項賽事出場19次入18球，效率超勁，面對曼聯同熱刺都梅開二度，可謂遇強更強！曼城剛於歐聯型爆反勝德國班霸拜仁，雖然發生計錯數痛失首名嘅「蝦碌」事件，但全軍上下都希望喺呢場大戰贏波轉移視線，唔使再畀人當笑柄。加上陣中冇乜傷兵，連「玻璃腳」祖維迪都好番可以待命，齊腳之下，柏歷連尼臨場調動應更加得心應手。
阿仙奴兵疲頂唔住

阿仙奴方面，開季15戰僅失11粒，後防非常穩陣。不過「兵工廠」聯賽作客唯一敗仗就係作客不敵曼聯，今次遇上攻擊力更癲嘅曼城，實難以予人信心。佢哋仲剛於歐聯造訪拿玻里打硬仗輸波而回，身心俱疲，教頭雲格同中場阿迪達齊齊鬧爆賽程打得密，似乎想戴定頭盔，就算今場輸得難睇都有得賴！

阿仙奴喺榜首領先次席利物浦5分，拋離第4位嘅曼城6分，睇落一哥位置坐得幾穩，但佢哋上場主場打和愛華頓查實踢得好辛苦，明顯已經冇早排咁sharp，加上奧斯爾、艾朗藍斯同基奧特今季差唔多踢足，近期已立立地油，今次去到曼城個恐怖主場，預咗要捱打，所謂久守必失，最堅之盾喺敵人強大火力下，難免會出現缺口，今次好有機會要乖乖哋擺低3分嘞！

比歷連尼(曼城領隊)：上場缺少高柏尼、阿古路同尼格度我哋都贏拜仁，球員證明佢哋堅有料。不過阿仙奴中場好勁，我哋要贏就要全力以赴！

雲格(阿仙奴領隊)：曼城人腳確係強，但我唔羨慕比歷連尼，因為我擁有更多創造型球員，好多仲係通天老倌，調配時更靈活。