多蒙特High盡 賀芬咸大反擊

猪拉多纳

德甲賀芬咸主場迎戰多蒙特，兩軍係班霸拜仁以外入波最多嘅球隊，賀芬咸踢法有前冇後，多蒙特防線傷停嚴重到幾乎真空，雙方近期都處於興奮期，今場必定對攻，入球大調整到3.5球都冇有怕，照捧2.02倍大盤。多蒙特踢完歐聯High得太盡，匆匆再戰恐怕體能捱唔到尾，想博好分頭，黑柴建議小注3.75倍主勝同埋28倍半全場「客主」。

多蒙特啱啱喺歐聯坐完過山車，完場前3分鐘絕殺馬賽由出局變首名，開心到癲，不過山長水遠作客法國搏得咁辛苦，搏完仲浪費唔少體力High爆慶祝，事隔唔夠三日，又要作客打死敵賀芬咸，雖然話士氣高，但體能損耗幾難回到氣，而且防線接近真空，除蘇保迪、曉姆斯、舒姆沙、根度簡同施雲賓達養傷外，主力中堅柏柏斯達夫普路斯停賽，連臨危簽下嘅替工文奴費特列治上仗賽後亦發現腳趾公受傷，如果連佢都唔踢得，防線就冇晒具經驗球員，教練高普預期要續用歐聯初踢正選嘅馬利安沙亞，拍住另一小將哥利爾根達或通天老倌哥斯基奧斯打中堅，防線一個領袖都冇，十分牙煙。
小敲28倍半全場「客主」

賀芬咸一向係多蒙特死敵，皆因自08年初上德甲後，多蒙特球迷一直唱衰佢哋嘅班主霍普，搞到兩軍上下同球迷都水火不容，亦令實力次一皮嘅賀芬咸每戰多蒙特都踢爭氣波，自賀芬咸升班後，雙方於德甲10度交鋒，賀芬咸4勝3和3負反佔上風，球隊啱啱喺德國盃同聯賽先後擊敗史浩克同法蘭克福，銳氣正盛，主場以逸待勞迎戰死敵，強陣出擊戰意加零一，隨時喺比賽末段趁客軍腳軟大反擊，今場除大盤外，主勝同半全場「客主」都值得小注一敲。
有線64及203台直播