倫敦打吡 車仔追打作客蟲

猪拉多纳

一講開倫敦打吡，個個都淨係諗起阿仙奴、車路士同熱刺呢三隊互撼，其實富咸、韋斯咸同埋今季升班馬水晶宮都係倫敦球會，今晚車路士就會喺主場同水晶宮展開倫敦打吡戰，車路士出晒名係地頭龍，而水晶宮則係作客蟲，今晚梗係揀龍唔揀蟲喇，捧讓球主勝﹗
歐聯輪換留晒力

車路士上場英超作客爆冷不敵史篤城搞到領隊莫連奴塊面黑過鑊撈，今晚「莫家軍」一定唔敢再放鬆，而且上場歐聯對布加勒斯特星隊一班主力如費蘭度托利斯、桑馬達、施治、拉美利斯等都得到休息嘅機會，預料車仔今晚可以full team上陣，再加上莫帥有塊主場金漆招牌，佢帶領嘅球隊包括波圖、國米、皇馬同車路士喺主場嘅戰績勁標青，今晚對住弱旅水晶宮要贏兩球或以上冇難度。
水晶宮作客7戰6敗

水晶宮喺新帥佩尼斯帶領下成績已有改善，近兩場全勝，暫時脫離榜尾位置，但其實呢兩場勝仗都係水晶宮主場，呢隊波一作客就例牌腳軟，今季七場作客賽事輸足六場，而且超過一半場數係輸兩球，讓球主勝捧得過﹗
now 621直播