恒大入細里程碑

猪拉多纳

初登國際舞台穩字行先

於摩洛哥上演的世冠盃今晚打半準決賽，首次有中國球隊參賽，廣州恒大（馬會譯名FC廣州）出戰埃及艾阿里。亞冠盃盟主恒大重賞激勵爭佳績，加上名帥納比領軍理應秤先。但佢哋畢竟初登大賽舞台，難免緊張唔敢冒進。艾阿里球員年紀偏大，料會拖慢節奏，預期形勢會拉鋸，捧入球細。

（中央5台及廣東體育周日凌晨零時直播）

廣州恒大一向奉行「銀彈戰術」，除咗贏波重重有賞，甚至連入波都逐球計獎金。球隊捧亞冠盃，會方總共向球員派發1.57億人民幣（約2億港元）獎金。今次踢世盃冠，獎金隨時更豐厚，球員肯定搏命。教練納比更請來意大利國家隊軍醫幫手，減低球員受傷機會，備戰相當認真。同時亦反映FC廣州面臨好大壓力，事關背負數以億計同胞Fans期望，不容有失，比賽時肯定加倍小心，以免犯錯。尤其係淘汰賽，一戰決生死，踢法穩陣行先亦係必然嘅事。
艾阿里老化體力輸蝕

艾阿里曾36次奪得埃及頂級聯賽冠軍及8次非洲冠軍，獲非洲足協選為20世紀最佳球隊，今屆係佢哋第5次出戰世冠盃，屬參賽次數最多嘅球隊，最威係06年成為季軍，上屆亦打入4強。不過艾阿里有「恐亞症」，喺世冠盃3次鬥亞洲球隊輸咗兩次，咁蹺都係0比1敗陣。

艾阿里另一隱憂係老化嚴重，防線主將兼隊長高馬已經38歲，進攻核心阿布捷卡亦35歲，正面睇係經驗豐富，但體能亦都輸蝕。估計佢哋會採取拉布，保留體力侍機打突擊。今仗比賽好可能一球定勝負。