曼城美男與野獸 弗到爆「廠」

猪拉多纳

15場夾埋入18球

今晚焦點梗係落喺曼城硬撼阿仙奴嘅英超早場啦！「藍月亮」領隊比歷連尼周中歐聯計錯數痛失小組首名，賽後死撐話留力砌「兵工廠」更重要。為面子着想，今晚派番「美男與野獸」阿古路同尼格度攻堅肯定唔衰得，喺無敵主場出擊讓跌Watt阿仙奴半一，2倍上盤梗係捧得過啦！

（now621台周六晚8:45直播）

兩支英超勁旅都成功躋身歐聯16強，暫且可以集中火力喺英超搶分。先講曼城，領隊比歷連尼周中歐聯以為要贏拜仁5:2先攞到首名，諗住冇行所以喺搏殺時間唔派阿古路落場，賽後佢死撐話首、次名出線都冇所謂，放眼阿仙奴場硬仗仲緊要。講到今晚場波咁重要，贏唔到咪咩「飛士」都冇晒？
麥馬拿文讚比帥戰術掂

「工程師」呢鋪係就係(火羅)咗啲，不過從另一個角度睇，曼城周中有耶耶托尼停賽、阿古路休戰加上尼格度踢唔夠半場，但都照反勝拜仁3:2，終止呢支德甲班霸今季主場全勝佳績，證明曼城後勁係幾咁凌厲、班球員係幾咁Fit，就連曼城名將、前英格蘭國腳麥馬拿文都向《曼徹斯特晚報》大讚舊會表現，先係話比帥套攻擊戰術使得，繼而又指「曼城對阿仙奴嚟講太強大」。

查實唔使「老麥」吹噓，大家都知曼城今季火力有幾堅，英國傳媒今季就畀咗個朵阿古路同尼格度，叫呢對箭頭做「Beauty and the Beast（美男與野獸）」，用「野獸」形容尼格度步大力雄，阿古路係「美男」就唔使講啦，呢對組合喺15場英超聯賽夾埋入咗18球，佔全隊總入球數4成4左右，火力絕對驚人，比歷連尼亦計劃派遣最強陣容出戰，傷愈嘅高柏尼同周中停賽嘅Yaya都會擔正孭飛，曼城前中後三線都咁堅。
阿仙奴跌Watt傷埋沙格拿

雖然話阿仙奴今季係踢到曉飛，但近況回落係不爭事實，上場聯賽主場畀愛華頓逼和1:1之後，周中歐聯仲淨吞拿玻里兩蛋幾乎出局，表現明顯跌晒Watt喎！「兵工廠」右閘沙格拿有傷在身，意味住贊堅臣又要擔正，呢位小朋友周中畀拿玻里嘅恩斯治尼玩到一頭煙，今晚對住倒戈兼且重拾佳態嘅拿斯尼睇怕同一下場，就連防守出眾嘅熱刺去到曼城地頭都要吞6蛋，相信阿仙奴都難逃厄運。