半個主場以逸待勞 艾阿里無懼殘兵恒大

猪拉多纳

世冠盃半準決賽今晚有史上首支嘅中國球隊登場，亞冠盃盟主廣州恒大（足智彩譯：FC廣州）會喺摩洛哥嘅阿加迪爾火併非冠盃冠軍、埃及班霸艾阿里。力奇唔係想潑冷水，不過話佢哋有能力喺90分鐘內搞掂對手，就有多少懷疑，始終艾阿里有半個主場之利又以逸待勞，要守住殘晒嘅恒大唔難，恒大讓一球，力奇捧2.2倍「讓球客勝」啦！

（中央5台及廣東體育周日凌晨0:00直播）

喺中超三連霸兼夾贏得亞冠盃嘅恒大，論實力拍埋艾阿里絕對唔輸蝕，特別係佢哋有個世界級教頭納比領軍，遇上咩大場面都冇有怕。但令力奇擔心嘅係，班波去到季尾的確出現疲態，大部分主力成季都踢咗超過50場波，之前亞冠盃決賽兩鬥FC首爾都佔唔到乜嘢甜頭，和波收場，最終只靠作客入球優惠奪標。到之後踢中國足協盃，兩回合決賽仲要輸埋畀貴州人和（足智彩譯：FC貴州），就算話佢哋有三大超級外援孔卡、穆里奇同艾傑臣孭飛，都唔係話贏就贏o架！
恒大波衫繡上中國國旗

另邊廂，有「非洲紅魔鬼」之稱嘅艾阿里，受到國內聯賽休戰兩年影響，一直只得非冠盃賽事保持班球員狀態，表面睇幾令人擔心。但換個角度睇，球員餓波餓得耐，有得落場會格外搏命，否則佢哋都唔可以稱霸非洲啦！更何況佢哋陣內主力諸如中場阿布捷卡同隊長中堅高馬亞，分別已經35同38歲，比賽少對佢哋保留體力仲着數。仲有，埃及同今次賽事主辦國摩洛哥同處北非，打埋算盤點計都係半個自己人。最後要講講，艾阿里其實係歷來參戰世冠盃最多球隊，經驗豐富，就算恒大今晚着住件繡有中國國旗嘅波衫出擊，都未必咁易制服到佢哋！
世冠盃賽制

今輪為半準決賽，如法定時間90分鐘內賽和，則會進行30分鐘加時，若仍未分出勝負，則互射12碼決勝。