修咸頓傷兵成籮 「喜鵲」主勝諗得過

猪拉多纳

講到近排英超表現最出色球隊，又點少得紐卡素嗰份呀！「喜鵲」喺11月3場聯賽贏晒，當中包括擊敗車路士同熱刺兩場代表作，教頭柏杜同門將告魯爾仲攞埋11月份最佳領隊同最佳球員獎項，上輪聯賽砌低曼聯，更打破長達41年作客奧脫福嘅不勝魔咒，今晚佢哋喺主場迎戰近況唔掂、傷兵成籮嘅修咸頓，絕對可以趁勢贏波，2.25倍「主勝」咪錯過！

紐卡素能夠打破長年作客曼聯不勝魔咒，全靠法國中場卡比耶一箭定江山，雖然呢位「破咒功臣」儲夠黃牌今場停賽，不過「喜鵲」破咒後士氣如虹，陣中仲有安尼達、迪奧迪、賓艾化等幾件猛將孭飛，可以繼續放心捧場。
「聖人」後備龍門唔夠班

對手修咸頓喺季初演出都好出色，尤其係條防線硬淨到爆，兩個禮拜前仲係全英超失波最少嗰隊之餘，更做過聯賽「三哥」。可惜「聖人」似乎經唔起快車考驗，早前接連輸畀阿仙奴同車路士不特止，就算對住弱旅阿士東維拉都以2:3落敗，依家跌到落第8位。

況且修咸頓傷兵有增無減，正選門將保路錫手部斷骨，替補嘅奇雲戴維斯背傷復出無期，中後場核心雲耶馬同尼達利基尼又要抖。最弊係依家把守最後一關嘅加沙寧加明顯唔夠班，由佢對車路士後備落場計起，踢咗兩場多啲就喪失6球，今晚造訪聖占士公園球場，睇怕凶多吉少。