利物浦今夜No蘇

猪拉多纳

熱刺主場喊打喊殺惡到暈

利物浦神級射手蘇亞雷斯喺英超喪入15球穩佔射手榜首，今次作客熱刺被視為對手防線心腹大患，不過「阿蘇」今季超過9成士哥來自對下游球隊，擺明係欺善怕惡格，呢次缺少隊長謝拉特同埋拍檔史杜列治幫手，加上熱刺一班惡人早已事先張揚會好好「招呼」佢，估計喺孤掌難鳴同全場被對手貼身緊纏下，阿蘇今晚未必有貨交，平手盤一於撐主場惡氣逼人嘅熱刺！

（now 621周一凌晨零時直播）
蘇亞雷斯欺善怕惡

蘇亞雷斯自9月尾停賽期滿復出就着晒火，聯賽10戰狂入15球，腳風順到冇朋友。有心水清嘅傳媒拎佢同曼城射手阿古路比較，「阿蘇」雖然產量較高，但士哥「含金量」就遠遠唔及阿古路，佢15個入波其中14粒來自目前排喺14位或以下嘅球隊，剩返嗰一球則係對住位列第5嘅死敵愛華頓時建功，另於作客一哥阿仙奴時一再失機，單睇紙上數據，似乎係欺善怕惡，淨係識恰弱旅。

利物浦現時位居次席，佢哋主場唔錯，但作客打大戰通常就冇料到，聯賽盃對曼聯輸0比1，聯賽鬥阿仙奴淨吞雙蛋，呢張成績表唔多理想，教頭羅渣士死撐話球隊有能力喺大戰贏波，暫時都係得把口。「紅軍」今仗續有射手史杜列治養傷，「阿蘇」又要喺前面孤軍作戰，最慘係連神奇隊長謝拉特都加入埋「十字軍」，祖阿倫或佐敦軒達臣等喺中場要佢哋做髒活尚可，但靠佢哋分波領軍就仲未夠班。加上樹大招風，熱刺今仗肯定視「阿蘇」為危險人物，防中場賀治比同伊天卡普爾更講到明會好「強捍」咁去凍結佢，唔會畀機會佢上腳。熱刺陣中咁多硬橋硬馬嘅惡人，睇嚟真係可以剋住「阿蘇」。
近6次主場對碰全勝

熱刺今季最大問題係鋒力不足，聯賽15戰只入15球，等於「阿蘇」一個人士哥嘅總和，以佢哋嘅人腳可謂完全唔及格。射手蘇爾達杜4個聯賽士哥有3球係12碼，佢上周中喺歐霸盃對安治連中三元，總算攞番多少信心，今戰料會繼續擔正攻堅。加埋佢哋近6次主場對利物浦全勝，平手盤捧得過！