紅魔靠「風筒」發「維」

猪拉多纳

喺歐聯搵番「尊嚴」嘅曼聯，今晚回師英超造訪阿士東維拉，雖然賽前傳出尹佩斯受傷抖1個月嘅噩耗，但依然有朗尼擔大旗，鋒力都夠保證，小妹相信只要佢哋踢番出應有水準，要攞3分應該冇問題，捧1.67倍曼聯客W啦！

今季由莫耶斯帶領嘅「紅魔鬼」，開季至今表現都好差，上星期仲爆出一名肯尼亞「魔粉」因而自殺，認真陰功！冇錯，以往要佢哋喺英超殺入前4攞個歐聯席位，的確係易如反掌，只係以佢哋今季水準，似乎爭到歐霸盃席位都應該要還神。
維拉主場成績唔掂檔

講番今場波，睇往績，曼聯過去35次對維拉取得25勝9和1負。如果淨係計曼聯造訪維拉公園嘅比賽，更已經有17戰不敗嘅紀錄。雖則話紅魔士氣一般，但爛船都有三斤釘，睇睇佢哋間中發威就打殘利華古遜同薩克達就知啦，何況主帥莫耶斯上次對薩克達半場開「風筒」得手，鬧醒班波，仲有邊個夠膽唔搏命先？

維拉今仗雖有主場之利，但佢哋開季至今7戰只贏得2場，射手賓迪基自從傷愈後，狀態一直未好過，現正陷入球荒，對住曼聯齋守頂唔到幾耐，捧客W冇衰啦！