羅馬受讓要得過

猪拉多纳

AC米蘭欺善怕惡

今晚意甲有AC米蘭主場迎戰羅馬，家陣嘅「紅黑兵團」一早已經唔再係6年前嗰支歐聯盟主嘅質素，對住今季聯賽未輸過嘅「雌狼」睇怕唔會有咩好下場，客軍受讓平半，捧1.91倍下盤啦！

（TVB301及廣東體育周二凌晨3:45直播）

AC米蘭係今屆歐聯唯一一支晉級16強嘅意甲球隊，但咁並唔代表佢哋嘅質素特別高，話就話近6場正式賽事保持不敗，但其實當中只係贏過兩場對手實力較次嘅比賽。巴洛迪利同卡卡回勇，無疑令「紅黑兵團」近況好轉，不過唔好忘記佢哋今季聯賽對住祖雲達斯同拿玻里呢啲強敵全部輸晒，證明一對勁旅就現形。
魯迪加西亞奪最佳法國教練

羅馬早排喺意甲4連和，陷入一個小低潮，好彩佢哋上仗對費倫天拿贏波，信心一次過返晒嚟，唔好忘記佢哋周中唔使踢歐洲賽，體力各方面都肯定好過「紅黑兵團」，加埋老大哥托迪已經復出，仲唔食住個勢喺AC身上搶分咩？況且教頭魯迪加西亞早排先至當選2013年最佳法國教練，梗係要領軍踢番場好波，AC想開W真係難啲喇！