恒大挑機 「大」戰拜仁

猪拉多纳

亞歐冠軍火力對決

世冠盃嚟到4強大戰，今晚上演「亞歐最強對決」！亞冠盃冠軍廣州恒大（足智彩譯：FC廣州），硬撼同樣首次參賽嘅歐洲霸主拜仁慕尼黑，無可否認，劍指「五冠王」嘅拜仁實力極強，但恒大憑住「南美三叉戟」嘅超強火力隨時大手交易，中數位3.5球照捧1.85倍入球大！

（廣東體育周三凌晨3:30直播）

以前唔少歐洲冠軍出戰世冠盃都自覺實力超班，輕敵之下往往令對手有機可乘，不過拜仁今次唔多似會「放生」恒大喇！除咗路明尼加落「柯打」，要湊齊德甲、德盃、歐聯、歐超盃同世冠盃完成「五冠任務」，無時無刻都咁認真嘅哥迪奧拿更講明：「好多人唔會點理世冠盃，但如果你明白呢項賽事嘅意義，就會知個盃係非常、非常重要！」由列貝利、湯馬士梅拿同馬里奧葛斯等超級巨星組成嘅攻擊線收到指令，梗係會放膽喪攻啦！
拜仁後防欠穩2場失4粒

恒大嘅前線固然水準極高，弊在後防實力明顯差一皮，面對拜仁強「鋒」真係輸少當贏。但係呢支歐洲勁旅都唔係冇破綻嘅，睇佢哋上仗歐聯對曼城成條防線突然形同虛設，就知佢哋都有「失魂」嘅時候。其中丹迪同謝路美保定最近更頻頻失準，拜仁最近兩場勁失4球，同佢哋嘅犯錯不無關係，恒大射手艾傑臣、孔卡同穆里奇夾手夾腳或者有機會執番一、兩粒，就算最後真係輸波，都未必捧蛋o架！
Data King 拜仁入3球好容易

‧拜仁近8戰中，有6場至少攻入3球。

‧馬里奧葛斯連續3場為拜仁入波，湯馬士梅拿近8戰有6場建功。

‧穆里奇為應屆亞冠盃神射手，14場賽事攻入13球。
乜都玩錦囊 拜仁夠決心讓2球照「W」

廣州恒大喺亞洲當然係頂級球隊，但係無論大賽實力同經驗，都好難同5屆歐聯冠軍拜仁比較，就算恒大今仗可以入到波，面對決心奪冠拜仁實在難逃一場大敗，讓到2球都不妨考慮1.95倍「讓客」。
世冠盃賽制

今輪為準決賽，如法定時間90分鐘內賽和，則會進行30分鐘加時，若仍未分出勝負，則互射12碼決勝。