對賽威慣 盃賽又醒 曼聯開火破「城」

猪拉多纳

喺英超踢到一鑊粥嘅曼聯，今晚嚟到英聯盃8強作客史篤城，領隊莫耶斯為求補鑊，睇怕連盃仔都唔會放過，球員鬥志根本毋須擔心。最緊要係紅魔鬼近20年可以話完全食住史篤城，莫帥今季領軍踢盃賽勝率又特別高，今場力奇一於撐1.68倍客勝！

（TVB301周四凌晨3:45直播）

曼聯喺英超排名第8，距離「一哥」阿仙奴10分，想衞冕成功難度極高。至於話歐聯16強雖然抽到好籤，但始終強隊如雲，最後要捧盃絕對唔易。講到底，莫耶斯要交代減壓，贏隻聯賽盃都好過冇，你話佢哋點會唔搏命先？

冇錯，莫耶斯今季排陣有啲亂點鴛鴦，不過就算佢唔用上場贏維拉個陣，輪換番諸如艾舒利楊格等，兼夾繼續重用最信得過嘅朗尼，對住史篤城夠殺有餘啦！
史篤城防線飄忽

無疑，史篤城近8戰僅逢1敗，狀態的確唔差，領隊曉士仲點名力撐頂替傷兵賀夫打中堅嘅馬克威爾遜有料，佢班波今季聯賽16戰仲要有6場冇失波添。不過球迷要注意嘅係，呢條防線表現其實幾飄忽，前仗對車路士失2球，上圈聯賽盃對住英冠嘅伯明翰都失3球，點講都唔係穩陣嗰隻啦！

最後要講講，原來史篤城自從93年9月聯賽盃贏過曼聯2:1後，之後雙方交手12次，曼聯就贏足11場和1場，考慮埋紅魔鬼今季踢各項盃賽9戰得7勝2和，勝率高達77%，今晚捧客W穩陣。
Data King 曼聯今季盃賽未輸過

史篤城對上一次贏曼聯已經係1993年9月嘅事。

曼聯近5次作客史篤城取得4勝1和。

曼聯今季踢盃賽9戰得7勝2和未輸過。