摩納哥新仔掂-1恩物

猪拉多纳

今晚阿King對法甲摩納哥主場對華倫西恩斯特別有心水，近期摩軍王牌法卡奧報稱有傷博走人，教頭雲尼亞里重用一班生牯仔，反而虎虎生威，可輕取曳到無倫嘅華倫西恩斯，建議直取讓球主勝。

（TVB 301周六凌晨3時30分直播）

摩納哥星級前鋒法卡奧嫌棄球隊冇歐聯踢，近期玩扭計報稱有傷連續四場聯賽缺陣，其實係想喺冬季轉會窗重開後，博跳船轉投皇馬或車路士。教頭雲尼亞里索性起用其他小將，好似兩名90後前鋒安東尼馬迪爾及利維亞尼亦趁機上位，近期頻有士哥，帶領摩軍連贏五場，呢班生牯仔絕不能小覷。相反華倫西恩斯近四仗輸三場，質素差幾條街，摩納哥贏兩粒可謂最低消費。
聖保利爭升班博「大」霧

至於德乙聖保利主場對卡爾斯魯厄，兩隊爭升班實搏甩髀，揀入球大穩陣。最後荷乙阿梅爾城主場鬥多德勒支，阿軍近五仗未輸過，依家氣勢正盛，唔赦跌晒Watt嘅一哥多德勒支，受讓不容錯過。

猪拉多纳