曼聯雙箭缺陣 主場獻細

猪拉多纳

曼聯五十一年未試過於聯賽主場三連敗，大軍今戰挾英超主場兩連敗之勢喺奧脫福迎戰韋斯咸，全球反曼人士都買定啤酒花生等睇好戲，撞啱「紅魔鬼」兩大射手尹佩斯及朗尼傷晒，睇嚟要破紀錄絕非空想！不過，「錘仔幫」鋒力甚弱，就算爆冷頂多小勝一粒，呢場可博細盤。

曼聯今季主場演出沒有最差，只有更差。佢哋本月初於快車期0比1輸畀愛華頓，跟手對紐卡素諗住可以反彈啦，點知以相同比數輸多場，問你怕未！「紅魔鬼」教頭莫耶斯多次打爛球會招牌，被封為破紀錄之王，今次將挑戰球會五十一年來未嘗聯賽主場三連敗嘅紀錄。大軍續有主力射手尹佩斯養傷，另一進攻重心朗尼都未必出得，要靠神經刀韋碧克擔起士哥重責，睇見都唔開胃。
安祖卡路爾浸浴扮耶穌

韋斯咸對上六次作客曼聯輸晒，近五次都冇士哥，於奧脫福保持521分鐘零士哥紀錄，堅唔掂！「錘仔幫」中鋒安祖卡路爾近日上載半裸浸冷浴「艷照」，仲攤開雙手扮耶穌，但呢個救世主今場仲未踢得。曼聯於奧脫福主場已失強勢，佢哋唔多擅長破密集，作客打反擊好地地，主場主攻往往老鼠拉龜，今次相信都唔例外，大勝機會唔大，若然埋門把握曳，隨時又輸多場0比1啊！

now621直播