拜仁讓球和拉唔住

猪拉多纳

哥帥落柯打 贏埋放大假

世冠盃今晚爆發王者戰，歐洲霸主拜仁慕尼黑對東道主拉查體育會，主隊令人意外咁連闖三關，成為史上第二支殺入決賽嘅非洲球隊，但無論經驗同實力同拜仁根本唔同檔次，預期今仗冇得打，拜仁究竟贏幾球好取決佢哋臨場發揮，基本上贏兩球至五球都係正常賽果，今場「讓球主客和」開到拜仁讓三球，菠菜價值唔高，要黑柴推介，寧願小注有4.4倍好分頭嘅讓球和。

（廣東體育頻道周日凌晨3時30分直播）

拜仁喺準決賽以3比0輕取亞洲冠軍廣州恒大，而且全場5度中楣中柱，打到恒大毫無還手之力，賽後唔少人對恒大嘅表現作出批評，更有德國傳媒認為恒大連踢德乙嘅資格都冇。不過黑柴就唔係咁諗，需知道拜仁對呢個盃賽極重視，教練哥迪奧拿更好尊重恒大教頭納比，賽前對恒大研究得十分透徹，而且由開波到完場，拜仁都堅持全場壓逼對手，以恒大球員嘅質素、經驗同速度，遇上認真作戰嘅新「地上最強」根本冇得揮，最終輸三粒唔可以話羞恥。拜仁踢完今仗就放假，哥迪奧拿早視冠軍為囊中物，今場絕對唔會放鬆，一定落柯打搏埋佢。
拉體會質庸難偷雞

拉查體育會喺1949年成立，係一個摩洛哥綜合性體育會，直到1988年第一次拎摩洛哥頂級聯賽冠軍。踏入上世紀九十年代後成績開始冒升，至今共贏得摩甲冠軍11次。

呢班波今次以主辦國身份參賽就一鳴驚人，先後殺敗奧克蘭及蒙特雷，四強更淘汰明尼路入決賽，佢哋四強戰明顯處於劣勢，但以細哨領軍嘅明尼路太着重個人突破，最終畀拉查體育會偷襲成功，不過今仗對住擅長控制球賽嘅拜仁，拉體會球員想攞控球機會都難，又點偷雞呢？