最聯 韋斯咸傷鋒捱「細」界

猪拉多纳

近況回勇嘅曼聯，今晚喺主場迎戰韋斯咸。兩軍雖然喺周四英聯盃8強齊齊贏波出線，不過呢兩班波鋒力都有問題，曼聯得番朗尼一個靠得住，韋斯咸又欠缺前線重心，2.15倍「入球細」值得一試。

（now621台周六晚11:00直播）
紅魔8仗主場聯賽入得8粒

雖然曼聯最近取得3連勝，狀態全面回升，但雷法爾就覺得佢哋今晚未必炒得起「錘仔幫」喇。事關紅魔今仗繼續缺少射手尹佩斯，就算另一前鋒朗尼趕得切復出，喺前線都只怕獨力難支，唔通寄望韋碧克又再大爆發咩？而且曼聯今季冇晒主場氣勢，8場喺奧脫福球場出擊嘅英超，夾埋都只係入得8粒，無復當年遇神殺神嘅霸氣。好在，曼聯條防線嘅表現最近有改善，連續3場波都保持到清白之身，相信缺少入波板斧嘅韋斯咸好難偷雞。

韋斯咸季初買入中鋒安祖卡路爾，可惜一直養傷至今，剩番嘅一對前鋒邁加同卡頓高爾級數欠奉，加上中場達寧同路蘭今晚又唔踢得，相信都幾難威脅到對方大門，咁嘅環境，相信韋斯咸都好大機會專心玩死守，今時今日嘅曼聯，想大炒對手又談何容易吖？