潘頓當晨采係寶

猪拉多纳

　　現今賽道形勢勝於一切，尤其係沙田馬場的跑道，例如利放頭馬還是利後上馬，利內欄馬匹還是走外之馬，這類偏差往往可對賽果產生好大影響，加上現時騎師陣容強勁，跑馬隨時蝕少少都唔掂，好似上周六賽事，十場裏有八場由外籍大師傅取勝，只有兩場係由本地薑成功偷雞，形成要贏一場馬確係要計劃得好周詳，任何細節都不容有失。

　　當然要贏一場馬，先決條件是幕後的決心，好似第三場呂健威馬房的「晨采」，雖然至今未贏過，但曾經五次跑第二，幕後上季開始已經好想贏馬，上季初曾經兩次在三班谷草一哩跑獲亞軍，全部由潘頓經手，今季由四班起步當然好有利，季初交由黎海榮熱身一仗之後，上仗換上潘頓，早段留得好好，完全沒有搶口，但入直路之後未能立即望空，要先收慢再移出少少取位，結果不敵全程走外、衝足一條直路的「威駿寶」，計表現其實「晨采」唔係差。

　　「晨采」呢匹六歲馬季內只跑過兩次，體力仍然好充足，潘頓復課一手操練，當佢係寶，比起上仗賽前只操一課積極得多，完全可以反映出潘頓對上仗之失不服氣。此駒上周四由潘頓親自彈草閘，那課試來出腳好敏捷，估計今仗好大機會跟前多少跑，以跑法克服外檔的不利，潘頓決心趁莫雷拉停賽盡情數胡，鬥志如虹，係時候為此駒勝回一仗！

　　廖浩賢