韋達再取戰利品

猪拉多纳

　　莫雷拉停賽至緊元旦，杜利萊及巫斯義亦係一樣，本來，焦點自然落在準一哥潘頓身上，點知佢近期好似「立」，再唔似得之前係又贏、唔係又贏幾場風範，令到成個騎師陣營形勢忽然失衡。情況等於以前，韋達1日騎足咁多場，場場坐騎熱到飛起，只要有三幾件唔三甲，幾場派彩唔會熱得去邊，依家唔同，只係個主角變潘生。

　　人有三衰六旺，韋達積弱一段長時間，以為國際賽贏兩場，之後會好景，點知都係唔算多產，目前贏26場，暫列騎師榜第二，但「雷神」一出番，加埋安國倫密密食，隨時踢佢出三甲。

　　韋達不愧13屆冠軍，冇蔡神仙條大水喉，仍有其他友好馬房支持，最明顯係大摩，今季早已同佢加強合作，唔係有咩意外，未來呢對騎練應該會繼續維持良好關係，佢馬千祈咪走漏眼。

　　講番今日韋達坐騎，第四場「戰利品」可能係全日最熱1匹，人人皆知超班，跑場所謂三歲馬條件賽，好似送場頭馬畀佢；第九場「都靈明珠」亦係穩打穩紮對象，條件好，唔使多講；第十一場「福爾摩斯」轉馬房前後都係韋達騎，但蘇偉賢開倉幾個月未用過韋達，呢次試辦，一定砌。Jack