車仔會紅軍師徒做大騷

猪拉多纳

寸王功利足球Vs羅帥主攻理念

師徒對決，羅渣士，誓要證明佢係青出於藍！曾喺車路士師承莫連奴嘅羅渣士將首次帶領利物浦作客由「寸王」師傅領軍嘅車路士，羅帥自上季接手利物浦後成功將紅軍變成一支攻力超強嘅球隊，上仗作客曼城嘅地獄主場都照樣主攻，今仗作客車路士嘅無敵主場一樣冇有怕，一於繼續同車仔鬥攻，入球大捧得過﹗

（now 621周一凌晨零時直播）
作客唔會改變踢法

保亞斯、奇勒同羅渣士都曾喺車路士跟過莫連奴，但前兩位領隊近期先後被炒，只有羅渣士喺紅軍取得好成績，可以話係咁多弟子之中教得最出色嘅一個，但羅帥同莫帥嘅戰術理念好唔同，後者一向主張功利足球，為求贏波不理過程有幾醜陋，相反羅渣士注重地面進攻，但就成功改造一向踢開穩守突擊、守強攻弱、海鮮味濃嘅利物浦變成一支採取主攻、火力驚人、表現穩定嘅爭標分子，今仗羅帥更唔會改變踢法，誓要以主攻踢法向師傅證明自己嘅戰術理念比佢更出色。

經過羅帥改造嘅紅軍連曼城都驚咗佢，係人都知曼城嘅主場有幾恐怖，強如曼聯、熱刺同阿仙奴都喺曼城球場遭大炒4至6粒，但唯一一隊能同佢周旋到最後、形勢不落下風嘅就只有利物浦，連曼城隊長高柏尼都話對利物浦一場係曼城今季最難打嘅一仗，可見紅軍今季真係唔嘢小，若非球證上仗發雞盲誤判，紅軍又點會入1粒咁少呀﹗
主場攻擊力有保證

雖則話莫連奴主張功利足球，但佢今夏重返車仔就話要大踢進攻足球，贏波之餘仲要踢出極具侵略性嘅足球，雖然車仔今季火力未算好勁，但主場攻擊力就有一定保證，除咗上場小勝史雲斯1粒之外，其餘8仗主場都能入2球或以上，同埋車仔今季防守唔係特別強，平均每場失1球，今場仲冇埋攞夠牌要停賽嘅防中拉美利斯，入球大值捧。

莫連奴 車路士領隊：我同羅渣士好friend，佢既好學又開明，我睇好佢o架！今季紅軍咁勁都係因為佢，再加埋隊中有個蘇亞雷斯，車路士呢場真係好難踢。

羅渣士 利物浦領隊：我好多謝莫連奴畀咗我好大嘅信心，又教咗我好多嘢，如果唔係佢，我今日都做唔到利物浦領隊，我好期待第一次同佢正面交鋒。