梁家俊騎外線馬醒

不死鸟

 正所謂落場無父子，呢句說話放諸馬場就最啱，皆因馬圈一向各為其主，如果徒弟落場要遷就師父嘅話，分分鐘落得一條未盡全力策騎嘅罪名。

       剛戰仍有十磅可減嘅梁家俊似乎深明此理，出策外線馬時絕對冇留手，當日頭場梁家俊騎賀廐「覓得寶」跑第二，就令到由師父蘇保羅訓練嘅「納帕二號」失Ｑ。事實上，梁家俊騎外線馬，表現不時比騎蘇廐馬更好，證明呢位見習生除騎功夠狠之外，上陣時真係連師父都無面畀。

        雖然剛戰贏完「錢會來」之後，梁家俊呢位見習生只得七磅可減，但筆者已經一再強調，此君騎功與蔡明紹相比，隨時有過之而無不及，後者季內頭馬數目佔先，主要係多得告東尼提供多匹實力坐騎，未必代表騎功係見習生中最好。

       以梁家俊嘅身手，有七磅可減其實仲有好大競爭力，加上近期外借機會極多，估計佢仍然會繼續靠外線坐騎搵食，如果日後見到有啲心水嘅梁家俊外線坐騎，即使同場有蘇廐馬列陣，都可放心捧場。