大勝福星前途無限

不死鸟

一年一度香港馬壇盛事女皇盃於上周日圓滿結束，結果由英國代表「百威勝」奪得，可謂實至名歸，香港代表「爆冷」亦輸得心服口服，事實上「百威勝」實力真係凌駕同場對手，以該日場地對於內欄後上馬甚為不利，但此駒竟然可以在劣勢下交出凌厲追勁，可以話牠擅跑變化地，難怪有關人士如斯有信心，因為隔日賠率曾經只得1.4倍，而當日臨場亦落重飛，呢一役幕後除贏得豐厚獎金之外，亦在投注上獲得豐厚利潤。
冠軍一哩賽?賽果則有點意外，賽前筆者已不睇好「好爸爸」，因見周一試草地時已露疲態，已將牠列為第三選擇，但勢估唔到會係「勝眼光」勝出，賽果令人有點意外，但都係香港代表勝出，能替香港爭光不失為好事。
睇番該日其餘本地賽事，蔡約翰馬房的「大勝福星」以兵不血刃贏來大把在手，實力表露無遺，該仗是其季內第二次上陣，而更係久休近四個月復出，無疑賽前做足工夫，但論狀態最多得八成多?，而但跑畢最後150米，以後勁輕取對手，呢匹「天文學家」之子，只憑新鮮感及步大贏馬，日後成熟向長發展威力仲強，升上三班一樣超級，下次再出1200或1400連捷無難度，值得存記。