水手光輝過年捱細界

猪拉多纳

兩邊前鋒死晒火

2013轉眼快過，妹頭自己就覺得今年發展幾順利，唔知各位讀者又經歷過啲乜？但無論如何，祝願大家明年會更好，身體健康、大家開心！講到今日係除夕，夜晚大家當然要去倒數玩過不亦樂乎，但出門口前，晏晝正好有一場澳職足智彩獨腳戲，中岸水手主場迎戰珀斯光輝，好頭好尾，大家一於贏埋佢！

自從前教頭艾萊特遠走高飛後，本來成績已經唔算突出嘅水手更加不穩，整個12月都係單跳咁4戰2勝2負，而且只係射入2球，完全死晒火。卡華斯歷重創長休對水手當然有重大打擊，重召艾賓尼伊斯爾遠水不能救近火，甚至最近仲話會借走埋另一進攻重心麥堅治，真係唔明水手點諗。
水手食胡靠個「守」字

水手同光輝有一個共通之處，就係唔識入波，雙方同樣喺今季聯賽只係射入10球，係比榜尾嘅墨爾本雄心好少少咁解，而水手目前仍值得信賴就係佢哋嘅防守力，希望靠守住對方而食胡。作客嘅光輝大家都知例必無好嘢，今季作客未嘗一勝外更只入得2球，陣中王牌史美斯長期休養，頂替嘅占美麥卡倫又未夠班，就連日本前鋒永井龍都傷埋，真係唔知佢哋仲有乜方法爭取入球。雙方都係冇乜攻力，年尾最後一戰當然支持入球細啦！

（有線64及203台周二下午3時直播）