水手三箭鬥穩冇攻「細」

猪拉多纳

最後之國立決勝戰唔衰得

就算日本足協高層開到聲，希望今日場日皇盃決賽能夠睇到攻勢足球，但係廣島三箭、橫濱水手又點會傻到為咗好睇，連個冠軍都唔要咁笨吖，呢場「最後之國立決勝戰」，唔博1.57倍入球細仲博乜？

（now711台、有線148周三下午1:00直播）

站喺足協立場，邊隊贏都係其次，最緊要係場決賽夠精彩，令入場觀眾High爆，所以日本足協專務理事、前國腳原博實賽前出晒口術，佢咁話：「呢次係今年嘅聯賽冠軍同亞軍對決，希望大家進取啲呢。」

但係對賽雙方又點會咁諗，亂咁同人搏錘呢？三箭講到明希望起孖，包攬日職、日皇盃雙冠結束球季，開創「三箭黃金時代」；水手嗰邊就一直為聯賽臨尾香猛咁自揼，咬牙切齒要贏番三箭捧盃，今季唔使四大皆空，不過大家互相熟晒路，貿然進攻好易偷雞唔到蝕揸米，唔穩陣啲點得？
唔想以敗軍形象留名

由對賽往績去睇，水手以19勝5和11負佔先，齋計盃賽交鋒9次，佢哋更以6勝1和2負大幅拋離。問題係今時唔同往日，三箭隊波呢兩年完全成熟晒，水手嗰邊今日仲有單箭頭藤田祥史坐波監，攻擊基本上靠中村俊輔、喺國立贏過高校、大學錦標嘅「國立男」兵藤慎剛後上搵食居多，個格局好似FC東京時對三箭嗰場準決賽，所以兩隊打穩陣波一啲都唔奇。

何況今場波之後，國立競技場就會重建迎接2020年奧運，邊隊贏就會喺國立歷史上留名，日媒呢幾日都猛咁回顧國立啲紀錄，水手、三箭自不然唔想以敗軍形象喺歷史出現，打得保守啲有乜出奇？