喜伯年執番正唔再靠赫

猪拉多纳

今晚蘇超有場直播，由喜伯年主場迎戰赫斯。自從名將畢查接掌兵符後，老牌球隊喜伯年已走出谷底，演出漸入佳境，相反「包尾大幡」赫斯質庸態曳，連場不勝踢到冇晒信心，此消彼長下主Ｗ實屬不二之選。

（亞視國際台周五凌晨3時45分直播）

作為前英格蘭中堅兼隊長，畢查係嗰種撞甩門牙帶血吞嘅硬漢，佢喺11月尾中途接手喜伯年時，眼見陣中冇晒士氣，首先要做嘅就係鞏固防線，注入強悍球風激起球員嘅鬥志，喺失球逐漸減少下，眾將信心亦提升，喜伯年近7場只輸過畀班霸些路迪，近兩仗仲贏晒兼冇失波，睇得出班波已經重上正軌。

赫斯因破產被扣15分，至今積分仲係負數，本身質素平庸，季初靠球員捱義氣頂硬上，但經過連場失利，班球員愈踢愈冇信心，加上主力加利奧利華、賴恩史堤芬臣等全部傷晒，作客好難擋得住氣勢如虹嘅喜伯年，主Ｗ有1.68倍不容錯過。