主場硬淨羅奇代爾以下犯上

猪拉多纳

英足盃第3圈賽事，乙組仔羅奇代爾越級挑戰英冠嘅列斯聯，羅奇代爾主場戰鬥力唔差，對住狀態回落、作客腳軟嘅列斯聯有望不敗，今仗受讓值捧，捧讓球主勝。

羅奇代爾嘅主場戰績係英乙裏面最好嘅，踢咗13場贏9場，近兩仗主場全勝共入五球，雖則話列斯聯級數高兩班，但正正羅奇代爾係乙組仔，呢啲弱旅往往有自知之明，明知對手實手比自己高，更會踢得穩陣博偷雞，而且今仗仲要喺自己地頭出賽，實會搏老命以免失禮「鄉親父老」，所以成日話盃賽易爆冷就係咁解喇！

列斯聯近四仗不勝，球員狀態稍為回落，而且呢班波作客表現唔掂，近期四場客戰只得一勝，今仗真係難言穩勝，再加上球隊依家喺英冠排第8，仲要爭上前六攞升級附加賽資格，球員亦無謂喺呢場足總盃搏命，今場讓唔起主隊。

now 621及633直播